बुलढाण्यामधून एक भीषण अपघाताची घटना समोर आली आहे. बुलढाण्यातील लाखनवाडा ते उदयनगर रस्त्यावर एसटी बस आणि मालवाहू वाहनाची जोरदार धडक होऊन अपघात घडला. या अपघातात दोन्ही वाहनांचे चालक जखमी झाले आहेत. दोन्ही जखमींवर सध्या रुग्णालयात उपचार सुरू आहेत.
याबाबत सविस्तर माहिती अशी की, बुलढाण्यातील लाखनवाडा ते उदयनगर दरम्यान रस्त्यावर असलेल्या पिंप्री कोरडे गावाजवळ आज सकाळी भीषण अपघात झाला. खामगाव आगाराची बस लाखनवाड्यावरून उदयनगर कडे जात होती. बस मध्ये एकूण ४७ प्रवाशी प्रवास करत होते.
यावेळी पिंपरी कोरडे गावाजवल विरुद्ध दिशेने येणाऱ्या मालवाहू वाहनाची आणि एसटी बसची समोरासमोर धडक झाली. अपघातानंतर बस रस्त्याच्या खाली गेली. दोन्ही वाहनाचे चालक गंभीर जखमी झालेत. तसेच बस मधील शाळकरी विद्यार्थ्यांसह काही प्रवाशी किरकोळ जखमी झाले आहेत. दरम्यान, बसचालकाला उपचारासाठी रुग्णालयात हलविण्यात आले आहे.
